A 02 - Kyrie Guð faðir hæsta traust

Sálmur þessi er latneskur að uppruna, frá 10. öld, Kyrie, fons bonitatis, og er svonefnd leisa, það er stutt stef sem sungið var á móðurmáli sem svar við einstökum þáttum messunnar, sérstaklega sekvensíum á hátíðum, og eins við helgigöngur og á pílagrímsferðum. Orðið leisa er dregið af bænaákallinu, kyrie eileison, Drottinn, miskunna oss. Bænin er þýdd á þýsku á 16. öld og varð fastur liður í lútherskum guðsþjónustum. Sálmurinn var snemma þýddur á dönsku af Claus Mortensen, Kyrie, Gud Fader, alsomhöjeste Tröst, og þaðan þýddur af Gísla biskupi. Guðbrandur biskup birtir þýðingu Gísla í Sálmabók 1589, nr. 99 og eins í Graduale 1594, nokkuð lagfærða og hélst sálmurinn þannig allt til 1801.