A 01 - Veni creator spiritus

Kom Guð faðir og helgi and

 Sálmurinn er þýðing á fornlatneskum sálmi, Veni creator spiritus, sem kenndur er við Hrabanus Maurus, þýskan erkibiskup um aldamótin 800. Sálmur þessi var fyrst þýddur á íslensku á 13. öld, „Heilags anda vísur“ (Kom nú hreinskapaðr himna, hlutvandr föðr andi) mun það vera elsta sálmaþýðing á íslenska tungu.1) Þar er þýtt undir dróttkvæðum hætti. Marteinn Lúther þýddi sálminn 1524, Gott Schöpfer, heiliger Geist. Hann var snemma þýddur á dönsku, Kom, Gud Skaber, Helligaand og er þýðing Gísla biskups þaðan runnin, eins og hana er að finna í Sálmabók Hans Tausen 1553. Guðbrandur biskup birtir aðra þýðingu í Sálmabók 1589 (nr. 90) og eins í Graduale. Hélst sú þýðing síðan í messusöngsbókunum og sálmabókum allt til 1801. Hann kom að nýju inn í Sálmabókinni 1871, nú í þýðingu séra Stefáns Thorarensen og hefur haldist síðan til þessa dags, Kom, helgur andi, kom með náð. Hann er nr. 520 í Sálmabók 2022. 

Hér er bil milli fyrstu lína til að skrifa megi söngnótur. Lúther byggði sálmalagið á hinum forna helgisöng og fylgdi það lag sálminum í þýskum og dönskum sálmabókum 16. aldar og æ síðan.