Þig sem í fjarlægð fjöllin bak við dvelur

Ýmsar útgáfur hafa verið í gangi af tilurð þessa ljóðs og lagsins sem Karl O. Runólfsson samdi við það. Sigríður Schiöth tók af allan vafa um það með grein sem birtist í Morgunblaðinu [stytt hér, sjá vísun í stafræna heimild]:

Árið 1932 kom á [Berklahæli Norðurlands í Kristnesi] ungur maður frá Húsavík, Valdimar Hólm Hallstað að nafni. Hann var prýðilega hagmæltur og var sí og æ að yrkja vísur og smákvæði og sagðist hann ekki hafa alltaf skeytt um að setja nafn sitt við kveðskapinn. Voru þessar vísur vinsælar og skrifaðar   MEIRA ↲

Ýmsar útgáfur hafa verið í gangi af tilurð þessa ljóðs og lagsins sem Karl O. Runólfsson samdi við það. Sigríður Schiöth tók af allan vafa um það með grein sem birtist í Morgunblaðinu [stytt hér, sjá vísun í stafræna heimild]:

Árið 1932 kom á [Berklahæli Norðurlands í Kristnesi] ungur maður frá Húsavík, Valdimar Hólm Hallstað að nafni. Hann var prýðilega hagmæltur og var sí og æ að yrkja vísur og smákvæði og sagðist hann ekki hafa alltaf skeytt um að setja nafn sitt við kveðskapinn. Voru þessar vísur vinsælar og skrifaðar upp af sjúklingum og starfsfólki innan veggja hælisins. Um tíma lá þar á hælinu fyrri kona Karls O. Runólfssonar tónskálds, Margrét Sigurðardóttir, og lést hún í mars 1934.

Ungi maðurinn frá Húsavík náði heilsu á ný, fluttist í sína átthaga og lifði þar langa ævi. Þar starfrækti hann fornbókaverslun og lést þar fyrir nokkrum árum. Árin 1976–1983 var ég organisti og söngstjóri við Húsavíkurkirkju. Þar var mér sögð sú saga að áðurnefndur Valdimar væri höfundur ljóðsins „Þig, sem í fjarlægð ...“. Gerði ég mér ferð heim til hans og fékk að heyra söguna beint frá honum sjálfum.
Sagðist hann hafa orðið undrandi, er hann frétti að ljóðið hans væri komið á prent, við lag Karls 0. Runólfssonar og textahöfundur þar nefndur „Cesar„. Tvær konur, sem verið höfðu á hælinu samtímis honum, en fengið bata, vöktu athygli hans á málinu, því þær kunnu ljóðið og vissu sannleikann. Sagðist hann hafa látið kyrrt liggja enda ekki auðvelt að leiðrétta þetta, en allir sem vissu þetta, sögðu frá þessu, svo þetta komst í hámæli á Húsavík og þar um kring.
Tilgáta mín er sú, að tónskáldið Karl O. Runólfsson hafi fundið ljóðið í eftirlátnum munum eiginkonu sinnar og ekki vitað hver höfundurinn var og þess vegna sett undir nafnið „Cesar“. Lag og ljóð fara vel saman og er þess vegna svo vinsælt sem raun ber vitni.
Ofurlitla breytingu sagði Valdimar mér, að Karl hefði gert á ljóðinu, og set ég hér leiðréttingu: „Heyrirðu ei – þig hjartað kallar á –? Heyrirðu ei storm, er kveðju mína ber?“ Finnst mér tími til kominn að birta sannleikann í þessu máli og að hinn látni heiðursmaður eigi ljóðið sitt. Hann gaf út nokkrar ljóðabækur en kunni ekki við að birta þetta ljóð sem komið var á prent undir öðru nafni.
Vil ég mælast til þess, að framvegis verði nafn hans tilgreint, ef flytja á „í fjarlægð“ – lag eftir Karl O. Runólfsson, ljóð eftir Valdimar Hólm Hallstað.“    ↑ MINNA