A 08 - Þessi sálmur má syngjast eftir graftarembætti

Sálmurinn er sagður ortur af Michael Weisse (1488–1534), Nun laszt uns den Leib begraben, og birtist í sálmabók sem hann gaf út fyrir Bræðrasöfnuðinn í Bæheimi árið 1531. Lokaerindið er talið eftir Martein Lúther. Þetta er þó þýðing eða öllu heldur stæling hins forna sálms  Prudentiusar (Aurelius Prudentius Clemens, 348–413), Jam moesta quiesce querela. Sálmurinn er útlegging orða Páls postula í 1. Kor. 15.42–54,  og var um aldir sunginn hér á landi við útfarir. Sennilega þýðir Marteinn sálminn úr   MEIRA ↲

Sálmurinn er sagður ortur af Michael Weisse (1488–1534), Nun laszt uns den Leib begraben, og birtist í sálmabók sem hann gaf út fyrir Bræðrasöfnuðinn í Bæheimi árið 1531. Lokaerindið er talið eftir Martein Lúther. Þetta er þó þýðing eða öllu heldur stæling hins forna sálms  Prudentiusar (Aurelius Prudentius Clemens, 348–413), Jam moesta quiesce querela. Sálmurinn er útlegging orða Páls postula í 1. Kor. 15.42–54,  og var um aldir sunginn hér á landi við útfarir. Sennilega þýðir Marteinn sálminn úr dönsku, en dönsk þýðing á þýðingu Weisse birtist í Sálmabók 1533.  Sálmurinn er tekinn upp lagfærður í Sálmabók 1589 (nr. 327) og eins í Graduale 1594 undir heitinu, Nú látum oss líkamann grafa. Þannig helst hann í íslenskum sálmabókum og öllum messusöngsbókum til 1801 er Magnús Stephensen breytir honum nokkuð. Í Sálmabók 1871 birtist svo þýðing séra Stefáns Thorarensen, Þér ástvinir eyðið nú hörmum. Hélst hún í sálmabókum síðan, allt til 1972 er þýðing Sigurbjörns biskups Einarssonar (1911–2008) leysti hana af hólmi, Nú hverfi oss sviðinn úr sárum, 5 vers. Sú þýðing er 4 erindi í Sálmabók 2022, nr. 374, Þótt líkaminn falli að foldu.

   Í Sálmabók 1886 er hann líka í þýðingu séra Valdimars Briem (1848–1930), Nú felum vér í myrkri mold.  Í Sálmabók 1972 og 2022 er aðeins tveim síðustu versum sálmsins haldið, nr. 384, Í friði látinn hvíli hér enda hafa þau verið sungin við útfarir fram á þennan dag.