A 02 - Gloria in excelsis

Sálmurinn er upphaflega fornlatneskur lofsöngur frá 2. öld, Laudamus te, sem í klassískum messusöng fylgir dýrðarsöng messunnar, söng englanna í Betlehem: „Dýrð sé Guði í upphæðum og friður á jörðu og velþóknun Guðs yfir mönnum.“ (Lúk. 2.14). „Vér lofum þig.“ Sálmurinn, Allein Gott in Höh sei Ehr, er ortur út frá þessum lofsöng árið 1523. Höfundur er talinn vera Nikolaus Hovesch Decius (1481–1546). Varð sálmurinn fastur liður í guðsþjónustu dönsku kirkjunnar á siðskiptatímanum. Decius var munkur sem gekk snemma til   MEIRA ↲

Sálmurinn er upphaflega fornlatneskur lofsöngur frá 2. öld, Laudamus te, sem í klassískum messusöng fylgir dýrðarsöng messunnar, söng englanna í Betlehem: „Dýrð sé Guði í upphæðum og friður á jörðu og velþóknun Guðs yfir mönnum.“ (Lúk. 2.14). „Vér lofum þig.“ Sálmurinn, Allein Gott in Höh sei Ehr, er ortur út frá þessum lofsöng árið 1523. Höfundur er talinn vera Nikolaus Hovesch Decius (1481–1546). Varð sálmurinn fastur liður í guðsþjónustu dönsku kirkjunnar á siðskiptatímanum. Decius var munkur sem gekk snemma til liðs við kenningar Lúthers. Hann var vinsæll predikari og tónlistarmaður. Auk þessa sálms, sem hann orti yfir Laudamus, orti hann sálm út frá Agnus Dei. Mun hann einnig vera höfundur laganna við þessa sálma. Báðir hafa þeir verið sungnir allt til þessa dags. Marteinn biskup hefur trúlega þýtt sálminn eftir danskri þýðingu Arvid Pedersen (d. 1554) Aleneste Gud i Himmerig (1533) en þar er sálmurinn fimm erindi eins og hér og hefur fjórða erindi verið aukið við frá því sem er í frumsálminum. Guðbrandur notaði ekki þýðingu Marteins heldur tók upp þýðingu Gísla biskups, Alleinast Guði í himiríki (nr. 104). Sálmurinn hefur haldist í íslenskum sálmabókum alla tíð, endurþýddur 1886 af Helga lektor Hálfdánarsyni, Um hann sem ríkir himnum á, og er svo í núgildandi Sálmabók 2022, nr. 266.