Innskráning ritstjóra |
AAAA12
Sósialistisk sveitarstjórnin
Tímasetning:1950
Tildrög
Hreppsnefndarkosningar á Stokkseyri, líklega 1950.
Sósialistisk sveitarstjórnin setið hefur í fjögur ár. Bakkusi tíðum færð var fórnin frískandi var að eiga tár. Óspart gefið á garðann var getið er lítt um fyrningar.
Nú þegar að valda sígur sólin setur að hroll og skjálftaflog. Fá eru í að skríða skjólin skrifað er allt á syndavog. Hópurinn fullur hugraunar horfir nú fram á kosningar.
Sprengt var í rásum, reistur skóli, ræsi úr dælum grafið var, samt mun vorri stjórn af stóli steypt í þessum janúar. Blæs þá í sín beru kaun Björgvin og hlýtur verðug laun.
Það vil ég segja góðum gestum gátuna set í stuðla og rím. Hæpið er mjög og hulið flestum, hverjir kjósa nú Sigurgrím? Hann því með stórum stendur geig studdur af Gísla í Beinateig.
Vafalaust áfram Símon setur sagður er klár á útsvörin. Ráðið þá gæti hann búi betur batnandi færu lífskjörin. Frægðar á himni fellur sól fæst ekki Stebbi á Sjónarhól.
Íhaldið reyndan Magnús metur maðurinn stjórnar Kumbravog. Störfin fjölþætt fengið getur fæst nú við kýr og sláturtrog. Ásgeiri við þeim hugur hrýs hikandi þó með ólund kýs.
Gunnari á Hólmi hátt er veifað hressa vill fólksins bágu kjör. Framboð hans sterkt er rökum reifað reyndur í margri svaðilför. Hrepps ef að sykki sjóðurinn sendur væri kafarinn.
|