Bygging sú er best af öllum

Vísan er trúlega um veitingu Jóns biskups Arasonar á prestakalli til einhvers Tumasar og hefur skáldið talið þá veitingu ómaklega. Yelena Sesselja Helgadóttir nefnir í umfjöllun um vísuna nokkra Tómasa sem fengu prestsembætti í tíð Jóns Arasonar biskups en telur líklegast að átt sé við Tómas Eiríksson sem fékk Mælifell í Skagafirði árið 1530. Hann var tengdasonur Helgu fylgikonu Jóns biskups og mikill fylgismaður þeirra feðga, Jóns og sona hans. Sonur hans og Þóru, dóttur Helgu og séra Ólafs Daðasonar, var Ólafur Tómasson lögréttumaður sem orti kvæði mikið um Jón og syni hans og aftöku þeirra.

Spássíuvísa þessi er í Syrpu Gottskálks í Glaumbæ (Add 11242, bl. 66r) neðarlega á síðu sem að mestu er óskrifuð.