A 207 - Sami sálmur með öðrum hætti* | BRAGI
Bragi, óðfræðivefur

Söfn

Íslenska
Íslenska

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur eru aðeins notaðar til þess að halda utan um innskráningar þeirra sem annast efnisstjórn.

Innskráning ritstjóra

A 207 - Sami sálmur með öðrum hætti*

Fyrsta ljóðlína:Oss má auma kalla
Viðm.ártal:≈ 0

Sami sálmur með öðrum hætti*


1.
Oss má auma kalla,
arfsynd gjörir það,
í fyrstu flekkar alla
fæðing og getnað.
Síðan vægir varla,
voða þrengir að,
verðum vér frá að falla
í fordæmingar stað.
Kyrieeleison, Kristíeleison, kyrieeleison.
2.
Lausn frá kvöl og kvíða
kunna ei verkin góð.
Sækir á syndin stríða,
sálum eflir móð,
að hreppi huggun blíða
og hjálpist nokkur þjóð
varð Kristur kvöl að líða,
kvittar oss hans blóð.
Kyrieeleison, Kristíeleison., kyrieeleison.
3.
Á jörð nema Kristur kæri
kæmi og vora mynd,
auma á sér bæri
og einn fyrir vora synd,
viljugur deyddur væri,
vesöl mannakind,
ævinliga fram færi
í fordæmingu týnd.
Kyrieeleison, Kristíeleison, kyrieeleison.
4.
Faðirinn hefur svo heita
hjartans ást oss téð
gefins vildi veita,
vora eymd hefur séð.
Sinn bað son að leita
sælu vorrar með
bana og blóðugum sveita,
blessun vinna réð.
Kyrieeleison, Kristíeleison, kyrieeleison.
5.
Vor sinni soddan kæti
synd og dauða mót,
önd svo aldri græti
ógn helvítis ljót.
Sjálfur Jesús sæti
á syndum vinnur bót.
Vor frá voða gæti,
hans vernd er góð og fljót.
Kyrieeleison, Kristíeleison, kyrieeleison.
6.
Rétt virðing að vanda,
vegsemd, þökk og lof,
föður, syni og anda,
aldri verði á töf.
Hættu allra handa,
hann oss forðar ef
orð hans viljum ástunda,
um þá biðjum gjöf.
Kyrieeleison, Kristíeleison, kyrieeleison.

* Þ.e. sami sálmur og Ein andlig vísa um vora upprunasynd og hvörninn hún er grædd og bætt sem er næst á undan í Vísnabók Guðbrands.