Séra Valdimar Eylands heimsækir æskustöðvar sínar

Séra Valdimar Eylands frá Winnipeg heimsótti æskusveit sína, Víðidalinn í byrjun júlímánaðar 1965. Sunnudaginn 4. júlí flutti hann messu í Víðidalstungu, sem fjöldi manns hlýddi á, bæði úr dalnum og víðs vegar úr Húnaþingi. Hann lagði út af orðum Krists: Þér eruð vinir mínir, ef þér gerið það sem ég býð yður. Var ræða prests bæði snjöll og lærdómsrík. Meðal annars ræddi hann nokkuð um vináttuna almennt, bæði þeirra sem saman búa og í fjarlægum heimsálfum. Eftir messu var ekið að Víðihlíð, samkomuhúsi dalbúa, þar sem konur sveitarinnar höfðu búið gestum veislu. Höfðu þær valið veislustjóra Axel Guðmundsson, oddvita og bónda í Valdarási. – Veisla þessi var mjög skemmtileg. Var auðfundið , að hér fylgdi hugur máli að fagna heiðursgestinum, sem voru séra Valdimar, frú hans og börn. Þar fluttu skemmtileg minni og mátulega löng, þau Björn Daníelsson kennari, Dalvík, Jónína Líndal húsfrú Lækjarmóti og Sigvaldi Jóhannesson bóndi Enniskoti. Er borð voru upp tekin, þá var stiginn dans í salnum góða stund. Í samsætislok þakkaði séra Valdimar fögrum orðum þessar viðtökur er fornvinir hans veittu honum. Í þessari veislu flutti höfundur heiðursgestinum kvæðið.