Poppsonnettur

Poppsonnettur.tumblr.com er vefsíða þar sem höfundur birtir sonnettur byggðar á íslenskum dægurlagatextum. Hugmyndin á bak við þá tilraun er ættuð af Bretlandseyjum, þar sem svipuð vefsíða hefur verið starfrækt um nokkurt skeið. Á þeirri síðu svífur andi sjálfs Shakespeares yfir vötnum í umritunum á dægurlagatextum listamanna á borð við Justin Bieber, Lady Gaga og Adele. Mest er skemmtunin raunar þegar málsnið hins upprunalega texta er eins fjarri upphöfnu og formföstu sniði sonnett­unnar og   MEIRA ↲

Poppsonnettur.tumblr.com er vefsíða þar sem höfundur birtir sonnettur byggðar á íslenskum dægurlagatextum. Hugmyndin á bak við þá tilraun er ættuð af Bretlandseyjum, þar sem svipuð vefsíða hefur verið starfrækt um nokkurt skeið. Á þeirri síðu svífur andi sjálfs Shakespeares yfir vötnum í umritunum á dægurlagatextum listamanna á borð við Justin Bieber, Lady Gaga og Adele. Mest er skemmtunin raunar þegar málsnið hins upprunalega texta er eins fjarri upphöfnu og formföstu sniði sonnett­unnar og hugsast getur, og úr umrituninni verður galsafullt samtal milli ólíkra tíma, hefða og stíla.
Fyrri sonnettan, sem hér birtist, er umritun á dægurlagatexta sem mörgum Íslendingum er kunnur. Lag Eyjólfs Kristjánssonar, Draumur um Nínu, var framlag Íslands í Söngvakeppni evrópskra sjónvarpsstöðva 1991. Textinn hefst á orðunum „Núna ertu hjá mér, Nína. Strýkur mér um vangann, Nína. Ó halt’í höndina á mér, Nína,“ o.s.frv. Viðlagið kunna margir eflaust utan að: „Þegar þú í draumum mínum birtist allt er ljúft og gott. Og ég vildi’ég gæti sofið heila öld. Því að nóttin veitir aðeins skamma stund með þér. Er ég vakna — Nína, þú ert ekki lengur hér. Opna augun — enginn strýkur blítt um vanga mér“. Efni textans er þannig strangt til tekið ekki svo órafjarri algengum yrkisefnum sonnettuskálda fyrri tíma, og hreint ekki illa til endurvinnslunnar fallið.
Uppruni síðari poppsonnettunnar er í rapptexta Erps Eyvindarsonar Viltu dick? í samnefndu lagi Erps og hljómsveitarinnar Sykurs. Áhugasamir geta slegið laginu upp á tónlistarveitunni Youtube, en það er nokkuð fjörlegt. Í rappinu rekur ljóðmælandi, líkt og algengt er í rapptextum, afrek sín á sviði drykkju, rapptónlistar og kvennafars af miklu hispursleysi, en viðrar um leið áberandi neikvæð viðhorf til hugmyndarinnar um fasta atvinnu. Í sonnettunni er efni rapptextans dregið saman með þeim formerkjum sem bragarhátturinn gerir kröfu um. Lokalínur sonnettunnar eru þannig, svo dæmi sé tekið, byggðar á viðlagi rapptextans, sem hljómar svo í upprunalegri gerð: „Ég vil ekki vinna, ég vil bara drekka drykk, og slæda upp á „frænku“ og segja bitch, viltu dick?“.   ↑ MINNA