Mennirnir (hluti)

Lengst í nafnlausum útskaga Ameríku
leynist Arákinn meðal streymandi vatna
umlukinn brunakulda jarðar.
Sjáið suðrið stóra og einmanalega.
Enginn reykur finnst í hæðum fjallanna
aðeins bjartar snjóbreiðurnar
og napur vindurinn sem auðnin hefur afneitað.
Ekki hlusta í grósku skógarins
eftir söngvum leirsmiðjunnar.

Allt er hjúpað þögn vinda og vatns.

En út um laufþykknið horfir stríðsmaðurinn
og frá lerkitrjánum berst óp.
Kattaraugu púmunnar blika
í snæviþöktum hæðum.

Sjáið hversu hljóðlega spjótin doka
heyrirðu hvernig þýtur í loftinu
sem örvarnar kljúfa.

Sjáðu brjóst hans og fætur
og hárið svarta sem glansar
í skini mánans.

Sjáðu reginauðn stríðsmannanna.

Hér er enginn. Söngfuglinn kliðar
eins og vatnsbuna á stjörnubjartri nótt.
Kondórinn þenur sitt svarta vænghaf.

Hér er enginn. Heyrirðu? Fótatak púmunnar
berst um loftið og laufið.

Hér er enginn. Sjáðu steinana.

Sjáðu steinana í Arákaníu.

Hér er enginn. Aðeins trén.

Aðeins steinarnir.

Aráki.