Sláttuvísur

Vel nýtast framræstar mýrar
grafið þurrkað land
víðar sáðsléttur
þar sem fá má mikla uppskeru
með áburði
— fyrir markað
vélvædd framleiðsla

Fáir, gæta enn gamallar siðvenju,
að bera fyrst niður
á miðju sumri
losa bæinn úr grasi
á laugardegi fyrir heyannir
Byrja slátt næst húsum, túnslátt á sprottnum teigum
töðuannir — hæg eru heimatökin

En berja líka
á snöggu valllendi
og gleðjast
við stöku laut
með blómgresi,
leita grasa
með lækjum og giljum

Og ekki vil ég
láta undan berast
að leita fanga
í mýrinni:
í seftjörnum
og djúpum hættum pyttum
með fergini

og líka vil ég hjakka
í þýfðum móum og mýrum
þótt rýr sé oftast eftirtekjan

Áður en vetur sest að
leita grasa hvarvetna
um þýfi Óðins kvánar
þótt rýr sé stundum eftirtekjan