Húnavaka

Blik er í augum og bros á vör.
í bílana er stigið og áfram hraðað för.
Æskunnar gleði er endurheimt.
Erfiði dagsins er lokið við og gleymt.
Heillar Húnavaka
héraðsins frjálsu börn.

Ganga svo hópar á gleðifund.
Grannar og vinir takast þétt í mund.
Það er sungið og leikið og dansað dátt
og dreypt er á glösum unz halla tekur nátt.
Heillar Húnavaka
héraðsins frjálsu börn.

En hætta skal leiknum er hæst ’hann fer,
það hollast er öllum, sem vilja skemmta sér.
Komandi dagur á kröfur og rétt.
Hvíldinni jafnan eru takmörk sett.
Heillar Húnavaka
héraðsins frjálsu börn.