Guðrún Jónsdóttir yfirsetukona 1732–1791

Guðrún var dóttir Jóns Eggertssonar bónda á Steinsstöðum í Tungusveit og síðan í Héraðsdal og konu hans, Ingibjargar Skaftadóttur. Sagt var að Guðrún sæi fleira en flestir aðrir og oft sá hún álfa, a.m.k. á sínum æskuárum. Guðrún og Páll silfursmiður, sonur Sveins Pálssonar prests í Goðdölum hétu hvort öðru eiginorði nokkuð ung. Páll réðist síðan í silfursmíði austur í Krossavík hjá Pétri Þorsteinssyni sýslumanni Múlaþings og vann hjá honum í nokkra vetur en Guðrún dvaldi áfram hjá foreldrum sínum í   MEIRA ↲

Guðrún var dóttir Jóns Eggertssonar bónda á Steinsstöðum í Tungusveit og síðan í Héraðsdal og konu hans, Ingibjargar Skaftadóttur. Sagt var að Guðrún sæi fleira en flestir aðrir og oft sá hún álfa, a.m.k. á sínum æskuárum. Guðrún og Páll silfursmiður, sonur Sveins Pálssonar prests í Goðdölum hétu hvort öðru eiginorði nokkuð ung. Páll réðist síðan í silfursmíði austur í Krossavík hjá Pétri Þorsteinssyni sýslumanni Múlaþings og vann hjá honum í nokkra vetur en Guðrún dvaldi áfram hjá foreldrum sínum í Héraðsdal.
   Hún varð á þeim tíma barnshafandi eftir ungan mann sem Illugi hét en hélt því leyndu fyrir foreldrum sínum. Þegar hún hafði tekið jóðsóttina komst hún til hálfbróður síns, Gunnlaugs í Sölvanesi, og þar ól hún barn sitt sem ekki varð langlíft. Foreldrar hennar tóku þessu mjög illa, einkum þó faðir hennar. Var Guðrún afar harmþrungin þann tíma sem hún dvaldi í Sölvannesi og orti þá ýmsar sorglegar vísur en hún var prýðilega hagmælt. Gunnlaugur kom svo á sáttum milli hennar og foreldranna og lét faðir hennar hana hafa fé nokkurt og fór hún þá að búa á Steinsstöðum.
   Þegar Páll Sveinsson kom að austan giftust þau Guðrún og var talið jafnræði með þeim því sjálfur hafði hann eignast lausaleiksbarn eftir hina fyrri trúlofun þeirra. Þau bjuggu síðan saman á Steinsstöðum og eignuðust sex börn, fimm syni og eina dóttur.
   Guðrún var yfirsetukona og naut mikils álits í því starfi og segir Gísli Konráðsson það almæli „að jafnan segði hún fyrir hvort börn þau yrðu skammlíf eður eigi, er hún tók við, og gengist það eftir."  Guðrún andaðis á Steinsstöðum sextíu og eins árs að aldri.   ↑ MINNA