Giuseppe Ungaretti 1888–1970

Fæddist í Alexandríu í Egyptalandi árið 1888 og lést í Mílanó 1970. Afríka setti mark sitt á bernsku skáldins en árið 1912 flutti hann til Parísar og kynntist þar ýmsum lista- og fræðimönnum, svo sem André Breton sem skrifaði stefnuskrá súrrealista. Fyrsta ljóðabók Ungarettis, Il porto sepolto, kom út 1916, en önnur bók hans, L’allegria di naufragi, 1919, aflaði honum frægðar á Ítalíu. Hann er með lýrískustu skáldum og fylgir hefð hinna fornu skálda: Petrarca, Tasso, Foscolo og Leopardi. Ungaretti er eitt af merkustu ljóðskáldum Ítala á 20. öld. Stíll hans er einfaldur og laus við mælskubrögð og ljóð hans, stutt og hnitmiðuð, hlaðin merkingu og með vísunum í ýmsar áttir. Þau geta verið myrk og óræð eins og títt er um nútímaljóð.