Mína Jesús mýk þú raun

Gísli Konráðsson segir frá því að Þormóður hafi búið þrjá vetur í Vaðstakksey með konu sinni, Guðrúnu Helgadóttur. Vísar hann til vísu einnar eftir Þormóð til staðfestingar þeirrar búsetu hans og að undir það síðasta hafi verið orðið þröngt í búi hjá honum þar og segir alsagt „að þar væri hann vetur þann, er kona hans lá á gólfi, og voru þau þá með öllu ljósmatarlaus. Þótti Þormóði þá neyð mikil að sitja í myrkri, einkum er svo við vissi.“ Segir Gísli að þá hafi hann kveðið vísu þessa og bætir við: „Eptir það gekk Þormóður út og ofan til sjóar, og fann þar nýrekinn sel dauðan, og hafði lýsi hans þegar til ljósa.“ (Söguþættir eptir Gísla Konráðsson. Reykjavík 1915–1920, bls. 150)