Forlög koma ofan að

Vísan er úr Rímum af Perseus Jovinssyni eftir Guðmund Andrésson frá Bjargi í Miðfirði. Hún er 6. vísa 6. rímu, síðasta vísa mansöngs. Svo virðist sem Páll Vídalín hafi tekið hana til handargagns og vikið við orðalagi og tilfærir Jón Ólafsson úr Grunnavík hana sem hún sé eftir Pál í orðabók sinni undir orðinu 'lag', 'lög' og þannig er hún einnig birt í Vísnakveri Páls lögmanns Vídalíns. Kaupmannahöfn 1897, bls. 131:

Forlög koma ofan að,
örlög kringum sveima,
álögin úr ýmsum stað
en ólög fæðast heima.

Þannig er og vísan jafnan höfð nú orðið.