Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Sveitasæla

Fyrsta ljóðlína:Man eg grænar grundir
Viðm.ártal:≈ 1900

Skýringar

Aðeins 1., 7. og 10. erindi eru prentuð í Skólaljóðum.
1.
Man eg grænar grundir,
glitrar silungsá,
blómabökkum undir
brunar fram að sjá.
Bændabýlin þekku
bjóða vina til.
hátt und hlíðarbrekku,
hvít með stofu þil.
2.
Fossar falla í giljum,
freyðir kolblá röst,
laxar leika’ í hyljum
létt með sporðaköst.
Silfurgliti sauma
smaragðlita hlíð
kaldra kristals-strauma
kvíslir vors á tíð.
3.
Bláleit fannafjöllin
fela’ í skýjum lind;
ei þver alda-mjöllin
efst í himinlind;
vötnin kyrr með kvaki
kætir svana fjöld;
bifð af vængja blaki
báran vaknar köld.
4.
Man eg morgunsunna
mærust þegar hló,
lönd og leiðir unna
logageislum sló;
gyllti hnúkinn háa,
huldu dimman sal,
heiðabeltið bláa
breiðan kringum dal.
5.
Fuglar foldu ofar
fagna’ í himinrann,
Guðs þá gæsku lofar
gjörvöll náttúran.
Grænan mjúkur minnist
morgunblær við lauk,
sólvermd þoka þynnist
þykk, sem áður rauk.
6.
Fram með fjarðar-síðum
firðar róa’ á mið,
fjármenn hóa’ í hlíðum,
hljómar bergmál við.
Út um dal með degi
dratta kýr á beit,
hnarreist hross á teigi
halda leika’ um sveit.
7.
Léttfætt lömbin þekku
leika mæðrum hjá,
sæll úr sólskins brekku
smalinn horfir á.
Kveður lóu kliður,
kyrrlát unir hjörð;
indæll er þinn friður,
ó, mín fósturjörð!
8.
Kærsta sjón, er sá eg
sýndi móður-storð,
brjóst er barn við lá eg,
blessa sonar orð;
ei má eðli hagga,
er það Drottins gjöf,
þar sem var mín vagga,
vil jeg hljóta gröf.
9.
Heima’ er hægt að þreyja,
hvíld þar sál mín fær;
þar mun þægt að deyja
þýðum vinum nær.
Ljúft er þar að ljúka
lífsins sæld og þraut
við hið milda, mjúka
móðurjarðar skaut.
10.
Ó, þú sveitasæla,
sorgar lækning best,
værðar-vist indæla,
veikum hressing mest,
Lát mig lúðan stríðum
loks, er æfin dvín,
felast friðarblíðum
faðmi Guðs og þín!