Hymnus*

Hymnus
Grates cano deus tibi
útlagður með sama lag:
Af djúpri hryggð ákalla eg þig –
eður sem: Videns et aures admovens –
það er: Í Babylon við vötnin ströng
(svo langt sem versið er).

Guð minn, faðir, eg þakka þér,
þú kóngur himnaranna,
fyrir son þinn Jesúm sendan mér,
sáluhjálparann manna,
fyrir ástgjafir góðar þín
og geymslu í nótt á högum mín
frá ofsókn óvinanna.

Fyrir þann sama blítt eg bið:
Brotin öll synda minna
lát þú mig kvittan vera við.
Verndarskjól handar þinnar
geymi nú í dag mig og mitt,
svo mein ei fái nokkurt hitt,
sem grand mér gjöri vinna.

Sjá þú, eg fel þér fús í hönd,
faðir og guð minn sæti,
líkama minn sem eign og önd.
Engill þinn trúr mín gæti
fyrir óvinar flærð og grimmd,
svo fái hann ei gjört mér skemmd.
Heyr mig, ó! Herrann mæti.