Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Til ferskeytlunnar

Fyrsta ljóðlína:Enn á ísa góðri grund
Heimild:Eimreiðin
Viðm.ártal:≈ 1925
Tímasetning:1924

Skýringar

Kvæðið birtist einnig í Stuðlamálum I, bls. 15–16, Akureyri 1925, en þar vantar í 4. vísuna. Kvæðið er ekki birt í Ljóðmæli eftir Ólínu og Herdísi Andrésdætur. Reykjavík 1924.
1.
Enn á ísa góðri grund
græðist vísum kraftur.
Ertu að rísa af rökkur blund
rímnadísin aftur?
2.
Vertu á sveimi vina til,
vek þá hreimi snjalla,
láttu streyma ljós og yl
ljóðs yfir heima alla.
3.
Þjóðar okkar áttu nafn
með yndisþokka fínum.
Gylltra lokka listasafn
liðast í flokkum þínum.
4.
Lítið á eg orðaval,
ef eg má þig flytja,
utar frá í óðarsal
yndi er þá að sitja.
5.
Þjáði þig aldrei ánauð neins
útlends valds í leynum.
Þú hefur haldið ávallt eins
Íslands faldi hreinum.
6.
Ísaspöng af andans hyl
Íslands söngvar þíða,
kalt er öngvum komnum til
kvæða- Lönguhlíða.
7.
Þar er angan hátts og hljóms,
er hlíðin fang þér breiðir,
en upp að vanga blaðs og blóms
brattar og strangar leiðir.
8.
Eilífð veit um veginn þann,
völt eru skeyti hinna,
enginn leit því enda fann
óðar-sveita þinna.
9.
Flýi njóla nesjum fjærst
að norðurpóli köldum,
þar á sól þín sigurglæst
sumarból á öldum.
10.
Þeki ósa ísa múr,
þá enginn rós hér finnur,
norðurljósa leiftrum úr
listin hrós þér spinnur.
11.
Var ei hrós þitt van né of,
villa ei ljós né skuggar
þann, sem rósum þylur lof,
þegar frjósa gluggar.
12.
Gaf þín ærið ljúfa list
lífsins kærust gæði,
enginn fær þá aftur misst
ef þú slær í bræði.
13.
Á ey og bala öldufalls
áttu sali kunna,
þú ert dala dís og fjalls,
dóttir alþýðunnar.
14.
Þó sumum háum lítist lág
leið þín, ná þeir hvergi,
en standa hjá er stiklarðu á
stuðla gljáu bergi.
15.
Undra heima áttu þá,
sem ýmsra gleymast sýnum.
Vel sé þeim sem verði á
vaka yfir seimi þínum.