Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Bogi Bjarnason Thorarensen sýslumaður í Dalasýslu

Fyrsta ljóðlína:Farðu vel, Bogi!
Höfundur:Jón Thoroddsen
Bragarháttur:Ljóðaháttur
Viðm.ártal:≈ 1850–1875
Tímasetning:1867
Flokkur:Eftirmæli

Skýringar

Fyrirsögn:
Bogi Bjarnason Thorarensen sýslumaður í Dalasýslu, dáinn 3. júlí 1867.
1.
Farðu vel, Bogi!
til betri heima,
svo þið feðgar finnist,
Bjarni og Bogi,
er báðir váruð
dáðmiklir drengir.
2.
Hefða‘g hörpu
og hetjustrengi
þíns um föður fengið
skylda‘g inna
orð og gjörðir
hinst er sátum saman.
3.
Munum orð öll,
einnig gjörðir,
og eið er unnum við;
það var á þúfu
í þínu landi,[1] —
hún var vökvuð vel.
4.
Vökvuð hún var
veigum dýrum,
og svo tárum tryggðar,
því að þér, Bogi!
um brjóstið hélt
hin forna Fides cana.[2]
5.
Þú sagðir þá
og sást til himins:
„þar við frændi! finnumst;
oftar né lítumst
í Ægisheimi; —“
sú varð sannspá rétt.
6.
Sæll ert þú, frændi!
að fyrri máttir
Sólheim um sjást,
volki veraldar
vera fjarri
og að guði gista.
Sæll ert þú, frændi! —
finnumst bráðum —
í gullsölum Gimla,
þar sem hreinhjarta
höldum leyfist
alvald augum sjá.


Athugagreinar

1.
Bogi sýslumaður var vanur að ríða með vinum sínum á leið að þúfu einni innst í Staðarfells landi, ef þeir fóru inn með Hvammsfirði; kvaddi hann þá þar og drakk með þeim vínflösku að skilnaði. Riði hann með vinum sínum út Fellsströnd skildi hann við þá á líkan hátt við Ytrafells-klif.
2.
Fides cana, hin grá (forna) Tryggð, er nefnd með gyðju nafni í Virgils Æneaskviðu I, 292.