Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Á Glæsivöllum*

Fyrsta ljóðlína:Hjá Goðmundi á Glæsivöllum
Bragarháttur:Goðmundarháttur
Viðm.ártal:≈ 1875
Tímasetning:1865

Skýringar

Prentað í fyrsta sinn í Snót, Akureyri 1877, bls. 201–202. Þessi færsla hefur ekki verið samlesin við þá frumprentun.
1.
Hjá Goðmundi’ á Glæsivöllum
gleði býr í höll.
Glymja hlátra sköll,
og trúðar og leikarar leika þar um völl,
en lítt er að setningi slegið.
2.
Áfengt er mungátið,
mjöðurinn er forn,
mögnuð drykkjarhorn,
en óminnishegri og illra hóta norn
Undir niðri’ í stiklunum þruma.
3.
Á Grím’ einum góða
af gulli höfuð skín,
gamalt ber hann vín.
en horns yfir öldunum eiturormur gín,
og enginn þolir drykkinn, nema jötnar.
4.
Goðmundur kóngur
er kurteis og hýr,
yfir köldu býr.
Fránar eru sjónir, en fölur er hans hlýr,
og feiknstafir svigna í brosi.
5.
Á Glæsivöllum aldrei
með ítum er fátt
allt er kátt og dátt;
en bróðernið er flátt mjög og gamanið er grátt,
í góðsemi vegur þar hver annan.
6.
Horn skella á nösum
og hnútur fljúga um borð,
hógvær fylgja orð;
en þegar brotna hausar og blóðið litar storð,
brosir þá Goðmundur kóngur.
7.
Náköld er Hemra,
því Niflheimi frá
nöpur sprettur á;
en kaldara und rifjum er konungsmönnum hjá,
halinn á hjarta þaðan slapp ég.


Athugagreinar

Lesbrigði m.v. aðrar útgáfur sem lesa þarf saman við ljóðasafn Gríms frá 1880 „loddarar“ í stað „leikarar“ (1. erindi).