Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Til Afródítu

Fyrsta ljóðlína:Geislum krýnda eilífa Afródíta
Höfundur:Saffó (Sappho)
Viðm.ártal:≈ 1950

Skýringar

Þessi þýðing birtist áður í bók Helga, Undir haustfjöllum árið 1960, og er engin breyting á henni hér frá því sem þar var.
1.
Geislum krýnda eilífa Afródíta,
ó þú barn Seifs, fjölvísa gyðja, heyr þú
mína bæn: lát brennandi þjáning eigi
buga mitt hjarta,
2.
heldur kom þú enn, svo sem einatt forðum,
er þú heyrðir rödd mína langt úr fjarska,
skildir allt, þinn iðbjarta föðurbústað
óðara kvaddir
3.
og í gullnum blikandi vagni beindir
báðum þínum vængstyrku fríðu svönum
gegnum loftin ofanfrá himni háum
hingað í skuggann.
4.
Brátt þú komst, ó, blessaða gyðja, þér skein
bros í mildum augum, þú spurðir hóglát
hvað mig aftur angraði, svo ég hefði
enn á þig kallað,
5.
hvaða þrá í hjarta mér ólgu vekti:
„Hverrar ást skal færa þér enn að nýju?
hver mun sú, er sálarkvöl þinni veldur,
Saffó mín kæra?
6.
Þótt hún forðist fylgd þína, skal hún leita
fundar þíns; ef hafnar hún þínum gjöfum,
skal hún gefa, elska þig eins á móti,
ástlaus þó sé hún.“
7.
Kom þú fljótt! ó, frelsa mig nú sem áður
frá svo beiskri angist, og lát mig höndla
það sem sál mín þráir svo heitt! ó, styrk mig,
þú, Afródíta!