Biskupsvígsla á Hólum 3

1.
Heilög og stór er hjartans þrá
að hefta vor meinin stríðu,
en varið yður að brjóta bág
við björkina Drottins fríðu.
Tíminn með brugðinn brand og sög
bíður á aldamótum,
en kirkjan setur í síðstu lög
sverðið að fornum rótum.
2.
Hið aldna, hið feyskna fer sem má,
það fellur, sem getur ei lifað,
eldur og sverð því sigrast á,
en sólunni fær ei bifað.
Sé viljinn sannur og hjartað hreint,
vér hræðumst ei ógnir neinar, —
Guð er í oss: vér göngum beint;
svo gjörðu Jesú sveinar!