Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Celeste 4

Celeste – Eftir ævinnar dag

CELESTE
Bálkur:Celeste
Fyrsta ljóðlína:Nú er sæla og sól yfir runnum
Viðm.ártal:≈ 1925
1.
Nú er sæla og sól yfir runnum,
söngur af lífi, ilmur og vor.
Loftið er kvikt af kvakandi munnum,
kuldinn sig grefur í lindum og brunnum,
himinsins blær stígur hljótt sín spor.
2.
Allt er þrungið af þrá til að unna,
þúsundir óska stíga frá jörð,
upp yfir landsins grjótköldu grunna
grösin sig rétta svo hátt sem þau kunna.
Ljósið heldur um lífið vörð.
3.
Hjörtun bærast og hugirnir líða
hærra en fuglavængirnir ná,
út yfir háfjallahringinn víða,
heim, þar sem ljósvöldin uppskeru bíða,
handan við röðulsins björtu brá.
4.
Yfir samhljóm af sumarsins ljóðum
sál þinni mæti eg í efstu hæð,
jarðnesk sem vorþrá í gróðri góðum
glóir þér fegurð á kinnum rjóðum, –
björt og hrein eins og bergstraumsins æð.
5.
Hátt yfir samhljóm af sumarsins ljóðum
syngjum við tvö okkar hjartans brag
og ausum upp skrautið af andans sjóðum, –
ég ann þínum svip á blágeimsins slóðum.
Unn þú mér, sál, eftir ævinnar dag.