Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Sannleikurinn og kirkjan

Fyrsta ljóðlína:Úr gömlum þjóðsögum þekkjum vér
Höfundur:Hannes Hafstein
Viðm.ártal:≈ 1875
Tímasetning:1884

Skýringar

Birtist einnig í Heimdalli, 1. árg. 7. tbl. 1884
1.
Úr gömlum þjóðsögum þekkjum vér,
að þeim, sem úr grónum haugum
gersemar upp vilja grafa sér
þeim gengur, uns á þeim bóla fer,
en þá ber þeim undur að augum:
þeir sjá kirkjuna ljósum í loga,
og flýja sem fæturnir toga.
2.
Og svo er það enn fram á síðustu stund
er sannleikann vilja menn finna,
og grafast að æð hans í andans grund
svo alheimur sjái þann dýrindis fund,
menn óp heyra sveitunga sinna:
„Kirkjan er byrjuð að brenna“
menn bannfæra þá, sem ei renna.
3.
Og sannast mun, ef um síðir þó
menn sannleikans gullæðar finna,
og ærlegir menn sigra ófrelsis róg,
og andinn brýtur upp steinrunna þró
og sannleikur sigur má vinna:
þá nýfæddur röðull upp rennur:
Að kirkjan, kirkjan hún brennur.


Athugagreinar

Í Heimdalli 1884 eru þessi ritbrigði:
2:5 Þeir óp heyra ófrelsis-sinna.
2:7 Þeir bannfæra ...
3:6 og enginn við óp þeirra rennur