Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Ljóðabréf Brynjólfs Einarssonar til Þorgríms Einarssonar

Fyrsta ljóðlína:Sendibréfs ég sest við skriftir
Viðm.ártal:≈ 1950
Flokkur:Ljóðabréf

Skýringar

Brynjólfur segir svo frá kynnum sínum af Þorgrími þeim er hann sendi ljóðabréfið:
Árið 1936 kynntist ég manni einum sem Þorgrímur heitir Einarsson. Hann er Húsvíkingur. Hann var þá fyrir skömmu kominn frá Noregi, þar sem hann hafði stundað landbúnaðarstörf, en vann nú hjá Helga Ben. Þorgrímur er hagyrðingur ágætur og að kynnast honum mátti heita andlegur hvalreki því í sannleika sagt hefir mért virðst harla snautt um slíka happadrætti. Þorgrímur þessi fór síðan til Reykjavíkur og gaf sig fljótlega einvörðungu að garðyrkju. Nú á hann gróðrarstöðina Garðshorn í Fossvogi. Hann hefur verið heilsutæpur nú um langt skeið. Hann brást vonum mínum sárlega þegar ég lagði það á mig að skrifa honum ljóðabréf. Hann skrifaði mér aldrei í staðinn, bar við heilsuleysi.
1.
Sendibréfs ég sest við skriftir,
sálunni úr aurnum lyftir
að skrifast á við merka menn.
Einn af þeim er „illi Grímur“
sem ástaljóð og kerskirímur
forðum kvað og ugglaust enn.
2.
Heilsufarið er hjá okkur
á að giska þriðji flokkur
á við það sem áður var.
Fótagigtin Hrefnu hrjáir.
Harðlífi mig sjálfan þjáir
og aðrir gallar ýmis konar.
3.
Hausinn á mér hálfgert tros,
hryggurinn þolir illa vos.
Maginn er mesti garmur.
Lappirnar mjög ég linast finn.
Leiðast er þó með skökulinn,
sá er nú orðinn armur.
4.
Hér hafa verið gæftir góðar
á geysi-aflamagni lóðar
fleyta hver sem fer á sjó.
Vill þó til að varðskip finni
veiðiþjóf í landhelginni,
utar fá þeir aldrei nóg.
5.
Útgerðin sem alltaf tapar
aðgerðina í landi skapar.
Ígerð margir af því fá.
Innflúensa er að herja
eins og gengur vertíð hverja
og lyfjabúðin lifir á.
6.
Sjaldgæft er að semjist vísa,
svo þarf ég nú varla að lýsa
framleiðslunni fyrir þér.
En blöðum okkar fjögra flokka
Fyrir skömmu tókst að lokka
eina vísu uppúr mér:
7.
„Brautin“ er blað sem kratar
beita við andlegheitum.
„Framsóknarblaðið“ fremur
frumlegt þykir í sumu.
„Eyjablaðið“ ýmsir segja
austrænu skáki í trausti
en „Fylkir“ er íhaldsfólki
fræðirit mest að gæðum.
8.
Vertu Grímur sæll að sinni,
súptu nú með konu þinni
þennan dreggjasopa úr Són.
Frúin heilsa báðum biður,
bírópennann læt ég niður.
Gleðilegt sumar, góðu hjón