Þar er sparkað kjaftað kýtt

Sundurdrátturinn hefst og fleiri og fleiri koma til starfa. – Já, og Leifi er kominn. Marka-Leifi er reyndar kominn til Stafnsréttar einu sinni enn. Hann Hjörleifur Sigfússon, sem þekkir öll fjármörk í Húnavatns- og Skagafjarðarsýslu – og miklu meira. Hann er kominn til að flýta fyrir drætti. – Stendur heima, stýft og gagnbitað! Honum er aðeins einum vant í nírætt. Hann er kominn, kollhvítur, tinandi, en teinréttur. Hann reykir vindil, svo á hann líka lögg í glasi. En margir fagna samt Leifa, þessari lifandi markatöflu sem nú er orðin snjáð og velkt af mikilli brúkun og misjafnri meðferð. Ó-já. Þrátt fyrir það og þrátt fyrir allt  er Leifi samt glaður yfir að vera kominn í Stafnsrétt.
Úr þætti RGSn: Göngur á Eyvindarstaðaheiði