Þú heyrir Drottinn

Þú heyrir Drottinn barnsins bænakvak
og beinir himindögg til jarðar niður.
Og sjálfur hóf ég söng og strengjatak
en sumum skáldum veitist aldrei friður.

Þú gafst mér Drottinn nokkur lítil ljóð
til lausnar þeim var ævi minni varið.
En tryggðir hef ég tungu minni og þjóð
í trú á þig og ættjörð mína svarið.

Ég eldist Drottinn, orð mín gerast þung
og eins er farið strengjatökum mínum.
Þó finnst mér sál mín alltaf vera ung
og ennþá rignir himindöggum þínum.