Ólyndi

Tími og veröld tölta sína leið.
Það tekur varla að erfa það við neinn.
Enginn sagði: Gatan sú er greið,
og gönguslóðinn, hann var aldrei beinn.

Nú fámennt er það fylgdarlið sem beið
er fyrstu sporin tókst og varst ei seinn.
Þá vonargleðin var sem laufgur teinn,
og vinaskari magna gerði seið.

Að lokum ertu látinn eftir einn
ljósið hörfar, opnast djúpin breið.
Tónninn, áður, tær og klára hreinn
er táður því að skáldgyðjan er reið.

Samt er gott þó sitji í hjarta fleinn
að semja ennþá versin morgunheið.