Barnagæla

Sterk eru tök hjá storminum
staðlaus rök hjá fávísum
lotin bök á bændunum
banavök í fallvötnum.

Oft er gjall í eldinum
óþarft spjall hjá málgefnum
rekstrarhalli á reikningum
rós á stalli í klettunum.

Oft er stál í eggjunum
undirmál hjá fláráðum
kaupin hál hjá krömurum
kotungssál í valdhöfum.

Oft er mór í mýrunum
mjúkur jór á sprettunum
þarfur bjórinn þorstlátum
þröngur skór á fótunum.

Oft er hlass í haugstæði
hylskinn lassi á vergangi
geðillt skass með skætingi
skeindur rass á ómenni.

Oft er hagl í hríðunum
heyktur nagli af klaufvirkum
fánýtt bagl hjá fúskurum
flókið tagl á stóðhrossum.

Oft er kvörn í eldhúsum
uppþembd görn í slefberum
aumlega vörn hjá amlóðum
óþæg börn á hrakhólum.

Oft er mosi í mýrunum
magnað vos á sjóferðum
hregg og rosi á haustnóttum
hýrlegt bros hjá ungmeyjum.

Oft er raun að ráðlausum
reiknuð laun að verðleikum
blóðug kaun af barsmíðum
brunahraun á afréttum.

Oft er reyr í runnunum
rauðaleir í flóunum
hljóðglöggt eyra á háðgjörnum
hlákuþeyr á vordögum.

Oft er fönn í fjalldölum
fögur hvönn á afréttum
ölduhrönn á útnesjum
eiturtönn í rógberum.

Oft er veiði í vötnunum
valinn greiði ferðlúnum
frosin skeið á fjörunum
falin sneið í hrósyrðum.

Oft er brenna að árslokum
orðasenna á mannfundum
dyndilmenni í danssölum
dyggðir kvenna í smáskömmtum.

Oft er list í ljóðunum
lasin vist hjá svíðingum
meyja kysst í myrkrunum
mjólkin yst hjá griðkonum.

Oft er tréni í ávöxtum
unnin greni á vordögum
dý og fen í dældunum
deyfð og slen í horskjátum.

Oft er babl í börnunum
brattur skafl í fjallshlíðum
haldlaus afli í hugdeigum
hættutafl í fjárspilum.

Oft er hop á áttunum
ístrulopi á höfðingjum
grálegt skop hjá geðköldum
góður sopi á pyttlunum.

Oft er bára á blindskerjum
breiður skári á engjunum
legusár af sjúkdómum
sorgartár af vonbrigðum.

Oft er lakk á umslögum
orðið takk hjá kurteisum
söluprakk hjá svindlurum
sveitarflakk á letingjum.

Oft er vín í veislunum
vinsælt grín hjá skáldunum
hænsni og svín á sorphaugum
svipljótt trýni á prökkurum.

Oft er fé á flækingi
fögur tré með ávexti
háa c í söngfræði
saurguð vé af níðingi.

Oft er raup í ragmennum
rennt úr staupi af ölkærum
óvíst kaup hjá orðfölskum
aprílhlaup hjá biðlunum.

Oft er brot á boðorðum
bjargarþrot í harðindum
fýsnaskot í fjörmiklum
fýlutota á kerlingum.

Oft er kröm í kornbörnum
kilpuð löm á hurðunum
mögur höm á hestunum
heimskan fröm í tilsvörum.

Oft er klöpp í árbotnum
undin löpp á hjólfættum
aldan kröpp á innfjörðum
óvís höpp af giftingum.

Oft er bleyta á engjunum
eftirleit á heiðunum
krofin feit af kindunum
kossageit á stúlkunum.

Oft er gæla í ástmálum
eftirmæli í blöðunum
barlómsvæl í bændunum
brothætt sæla í hjúskapnum.

Oft er hrefna á innfjörðum
undirgefni í þrællyndum
fágað stefni á fleyjunum
fjölþætt efni í spakmælum.

Oft er kvak í álftunum
orkutak hjá karlmennum
kveðin staka á kvöldvökum
kropp í bak á fjarstöddum.