Vísur Hjaltalíns prests um árferði 1831 | Húnaflói – kvæða- og vísnasafn
Húnaflói – kvæða- og vísnasafn

Innskráning ritstjóra

Vísur Hjaltalíns prests um árferði 1831

Fyrsta ljóðlína:Vetur góður víðast hvar
bls.III 704-705
Viðm.ártal:≈ 1825
1.
Vetur góður víðast hvar
var um rjóður Ísfoldar,
gripum sjóður Fjörgyn bar,
fólst ei sjóður jarðhaddar.
2.
Vorið gott og var í ár,
veitti drottinn gæði klár,
ofan dottin Ýmis tár,
örfuðu sprottin jarðar hár.
3.
Sólin glansa sendir blíð
sátu bands með kjörin fríð,
njótum brands svo notaþýð
norðanlands var besta tíð.
4.
Haustið síðan hefur sent
hörku tíðar merkið kennt,
snjó um hlíð og flatir fennt
fljót og víðir ísum rennt.


Athugagreinar

Skýringar Jóns Torfasonar úr Húnvetningasögu GKon.
1.
Ísfold: Ísland
Fjörgyn: jörð
Sjóður jarðhaddar(jarðarhárs): gras
2.
Ýmir: jötunninn sem jörðin er gerð úr
Ofan dottin Ýmis tár: regn
Hár jarðar: gras
3.
Sáta(sæta): kona
bands:(skrautbanda) kona
Njótur brands(eldiviður): maður
4.
Víðir: sjór