Ákall

Gefðu mér, gefðu mér
nýjan heim

gefðu mér nýjan heim
til að klæðast,
mjúkan, voðfelldan heim,
sá gamli er orðinn slitinn
og þyrfti í þvott,
mér er kalt, gefðu mér
nýja heim

gefðu mér nýjan heim,
ég vil fleygja þessum druslum
áður en ég verð alltof
háður þeim,

gefðu mér nýjan heim
til að borða,
heitan, ilmandi heim,
sá gamli er orðinn beiskur
og braut í mér tönn,
ég er svangur, gefðu mér
nýjan heim

gefðu mér nýjan heim,
ekki samsafn af leifum
ég vil fá eitthvað gómsætt
– fleygðu þeim

gefðu mér nýjan heim
til að elska,
blíðan, kyrrlátan heim
sá gamli er orðinn fullur
af gereyðingu,
ég er hræddur, gefðu mér
nýjan heim

gefðu mér nýjan heim,
ég vil granda þessum vopnum
áður en okkur verður
eytt með þeim.