Söfn

Íslenska
Nynorsk
Esperanto

Persónuvernd:

Vefurinn safnar engum upplýsingum um notendur sína. Leturgerðir eru frá Google sem skráir notkun á þeim.
Vefkökur (cookies) eru aðeins notaðar til þess að halda utan um innskráningar þeirra sem annast efnisstjórn.

Flokkar

Allt  (725)
Ástarljóð  (8)
Biblíuljóð  (3)
Eftirmæli  (11)
Gamankvæði  (12)
Háðkvæði  (5)
Heilræði  (1)
Hindisvík  (2)
Húnaþing  (7)
Húnvetningar  (6)
Jóðmæli  (1)
Jólaljóð  (2)
Kappakvæði  (1)
Lífsspeki  (2)
Ljóðabréf  (6)
Náttúruljóð  (47)
Rímur  (1)
Sagnakvæði  (1)
Sálmar  (2)
Skáldsþankar  (30)
Strandir  (2)
Söguljóð  (10)
Tíðavísur  (1)
Tregaljóð  (2)
Þululjóð  (1)
Ævikvæði  (2)

Staðarskáli er Ísland

Fyrsta ljóðlína:Staðarskáli er Ísland
Heimild:Kvæðasafn bls.291
Viðm.ártal:≈ 1975
Flokkur:Skáldsþankar
Staðarskáli er Ísland, einhver þétting
í andrúmslofti veldur þeirri staðreynd.
Það er eins og mikið safngler sogi
í sjóðandi brennidepil alla geisla
inn í þessa miðstöð mannaferða
Mekka þeirra sem á landið trúa.
Í skurðpunkti þessum skerast allar línur
og skýrt er þar í einni sjónhendingu
hvernig okkar lífi í þessu landi
er lifað og í raun og sanni varið.
Ísland sem er dauðadrukkið kaffi
dagað uppi volgt í hálfum bollum
börn er mæna á kassa Rauðakrossins
kúrekahúsgögn bæsuð, fitug, músík
kokteilsósa, lödufylli af frænkum
á ferð í stretsbuxum og lopapeysum.
Úr sjálfsala er hægt að hringja í bæinn
halló segir einhver, hvernig gengur.
Sjoppan er með kort og kalda drykki
kokkurinn steikir pöntun númer þrettán.
Svo kemur Norðurleiðarrútan rauða
rennur í hlaðið, aðrir bílar fara
nú má heyra ræstan dísildreka
dreifbýlinu óþreytandi að sinna.
Hér vil ég una ævi minnar daga
innst í skoti bíða veitinganna
átekta og halla mímishöfði
hógvær undir flatt og nema allt þetta.


Athugagreinar


Á námsárum höfundar kom fjölskyldan einhverju sinni siglandi frá Noregi með ferjunni sem þá hét Smyrill og þegar þau nálguðust landið gekk hann út á þilfarið til að bíða eftir þessari tilfinningu sem er kallað landssýn, að sjá landið rísa úr sæ, að verða uppnuminn rétt eins og mörg skáld áður fyrri, Steinn Steinar og fleiri. En ekki gerðist það. Síðan óku þau sem leið lá frá Seyðisfirði í bæinn og komu við í Staðarskála. Þá fékk skáldið allt í einu þessa Íslandstilfinningu, þarna var íslenskasti staður í heimi. Upp úr því varð kvæðið til.
Eftir að ljóðið birtist á bók, hringdi Magnús heitinn í Staðarskála og tjáði höfundi að hann væri svo hrifinn af þessu kvæði að hann ætlaði að fá prestinn á Melstað til að skrautrita það og láta það hanga uppi ef hann mætti. Svo varð. Nú er ljóðið sandblásið í gler á nýja skálanum.
RUV/Úr Kiljuþætti 8. okt. 2014, viðtal Egils við Þórarinn Eldjárn
Karlleggur Tjarnarmanna:
Þórarinn Kristjánsson 1816-1883 prestur, sat Stað í Hrútafirði 1847-67, síðar Reykhlt&Vatnsfj.
Kristján Eldjárn Þórarinsson 1843-1917 prestur á Tjörn
Þórarinn Kristján Eldjárn 1886-1968 bóndi og kennari á Tjörn
Kristján Eldjárn forseti 1916-1982
Þórarinn Eldjárn skáld 1949