Á Másstöðum

Á Másstöðum á ég mitt unaðarskjól,
þar ávallt í sál minni lifi ég jól.
Við blækyrran flötinn á Flóðinu skín
sú fegurð sem ætíð mig dregur til sín.

Ég dvaldi þar fyrrum á bernskunnar braut
og blessun af vist þeirri féll mér í skaut,
og því er ég Másstöðum tengd fyrir tryggð
sem á traustum og heilbrigðum grunni er byggð.

Ég elska minn dal – þennan dýrðlega reit
þennan dal sem er bernskunnar heimur og sveit.
Og þakklát ég er fyrir það sem ég hlaut
og þess sem ég ætíð hjá foreldrum naut.

Við blækyrran flötinn á Flóðinu skín
sú fegurð sem ætíð mig dregur til sín.
Á Másstöðum á ég mitt unaðarskjól,
þar ávallt í sál minni lifi ég jól.