Í Tjarnarskarði

Sefgrænir bakkar, silfurgáruð tjörn,
sundfuglakvak og mosabrúnar skriður.
Valllendisgrundir, steinbyrgi og börn.
Búsmali í hlíðum, foss og lækjaniður.

Bergmál í hömrum, burnirót á snös.
Burkni í skúta undir Háuklettum.
Brúða og Surtla sækja í efstu grös.
Sandurinn rýkur undan fótum nettum.

Fögur er hlíðin, friðsælt Tjarnarskarð.
Flögra í lyngi glaðar ungamæður.
Ásthrifum vorsins angar laut og barð.
Æskan á næsta leik og hjartað ræður.

Sólvermdur blærinn blómahörpur sló.
Brumhnappar litlir sprungu fyrr en varði.
Fífillinn kyssti fjólu í Steinamó
fermingarvorið uppi í Tjarnarskarði.