SöfnÍslenskaÍslenska |
Flokkar
Allt (334)
Afmæliskvæði (25)
Ástarljóð (4)
Baráttukvæði (1)
Bæjavísur (6)
Bænir og vers (5)
Daglegt amstur (21)
Eftirmæli (2)
Ellikvæði (2)
Formannavísur (4)
Gamankvæði (24)
Hátíðaljóð (6)
Heilræði (5)
Heimsádeilur (2)
Helgikvæði (1)
Hyllingarkvæði (29)
Jólaljóð (20)
Lífsspeki (14)
Ljóðabréf (10)
Náttúruljóð (49)
Sagnakvæði (1)
Sálmar (1)
Skáldsþankar (55)
Særingar (1)
Tíðavísur (17)
Tregaljóð (8)
Vögguljóð (1)
Þululjóð (6)
Ættjarðarkvæði (9)
Ævikvæði (1)
FiskiróðurFyrsta ljóðlína:Þeir ýta úr vör
Höfundur:Jón Björnsson ritstjóri
Heimild:Sóldægur - ljóð. bls.45-50
Viðm.ártal:≈ 1925
Tímasetning:1922
Skýringar
Höfundur stundaði sjómennsku frá unga aldri og lýsir hér afdrifaríkri sjóferð....
Þeir ýta úr vör.
- Það er útsunnanvindur, næðinganótt og norðljósasindur. Siglan er reist. - Nú sýður á keipum, titrar hver súð og tognar úr reipum. Hafnar-Björn heldur um hjálmunvöl. Að skautinu gætir Gunnar á Möl. Sigla þeir mikinn en mæla fátt. - Löngum er byljótt landsunnanátt. * Runninn er dagur og rennt á mið. - Svifta þeir niður seglinu og setjast færið við. Útsunnankaldinn er orðinn að logni. Sólgeislabjarminn blikar á sogni. - Nú bítur hann, piltar kvað Bergur og dró. Brostu þeir í kampana en Björn - hann hló. Djúpmiðaþorskinn draga þeir í gríð. Víðir er ríkur og veröldin fríð. * En haustveðrið er hverfult. Á Kaldbakstindi er ský og náttsvartur bakki rís norðrinu í. - Sitja þeir við færin í sjómannsró. Gull sitt þeir eiga í grænum sjó. En Hafnar-Björn lítur til hafsins oft. - Bakkinn dimmur breiðist um hið bláa loft. * Rokinn er hann á í öskrandi hríð. - Guð hjálpi þeim, er sigla nú um sædjúpin víð. Hátt lætur stormur, en hærra bylgjan þó. Boðaföllin byltast um blindskerjasjó. Í holskeflu brotum fer bátur til lands. - Stígur hann í voðanum vikivakadans. Lækkið þið seglin! Við siglum hann í kaf! - Nú er vitlaust veður og vonskulegt haf. - Heim hvarfla hugir. Þar hýrast börn og víf. - Gefðu okkur þeirra vegna guð minn ennþá líf! - Skellur yfir farið fnæsandi hrönn, köld eins og jökull og hvít eins og fönn. Þóptufullur báturinn úr boðanum skýst, - - þyrmdu ´onum, þyrmdu ´onum, þegar þú aftur ríst. - Sitja þeir hljóðir. Séð hafa þeir áður, hve ægir er máttgur og mikilráður. Kaldir að utan með eld í sál, sigla þeir í blindhríð um brimskerjaál. * Komið er að landi. - En hver vill sigla í naust? Það er sem hafgnýrinn hafi feigðarraust. Svarrar á björgum brimfalda mergð. Að hleypa upp í landsteina er lífshættuferð. - - Strengir Björn um herðar stjórntaumana báða. Konungur himnanna hann skal nú ráða! Á báðar hliðar blindsker og brim fyrir stafni. Höldum samt upp í herrans nafni! - Holskeflur falla og hrifsa far, kippa því á vetfangi á kaf í mar. Skýtur upp kyli, kinnung og ár. - Flýtur einn í öldunum ískaldur nár. Skolast hinir með skipi á land. - Öldurnar falla og freyða við sand. Glymur um ströndina stórsjóa hlátur. Kallar í himininn konunnar grátur. |