Skíðadalur

Græddu mein hjá meyju og svein,
mjallar fríði salur.
Sjónarsteina unun ein
ertu, Skíðadalur.

Láttu skarta um brekku og brún
bjarma glæstra vona.
Þýddu dula draumarún
dætra þinna og sona.

Meðan áin blástraum ber
og brýtur úr farveg sínum,
vefðu það sem íslenskt er
upp að barmi þínum.

Blómgist kjarkur, birta og þor
við brjóstin þinna hlíða.
Fegurð, gæfa, von og vor
vefji dalinn Skíða.

Eigðu þessa ósk frá mér,
æ í skaut þitt niður:
ár og daga drjúpi þér
drottins ást og friður.