Skúli og Clausen komu að

Skúli og Clausen komu að
Klausti forðum daga.
Það sem skeði á þessum stað
þykir skrýtin saga.

Clausen var með harðan hatt,
hress í bragði og glaður.
Af Skúla hvorki draup né datt,
hann dróst inn berhausaður.

Kom á fólkið hálfgert hik.
Hattinum Clausen lyfti
og eftir nokkur augnablik
urðu stjórnarskipti.

Þerna ein til þeirra gekk,
þeim hún sæti velur.
Með Clausen fór á besta bekk,
en bílstjórann í felur.

Oft hafa litlar þakkir þáð,
þeir sem harðast púla.
Köld eru jafnan konuráð.
Clausen steypti Skúla.

Þeir sem feta stjórnarstig
og stíga í hæstu raðir.
Svei mér verða að vara sig
að vera berhausaðir.

Ókunnugur undur létt
öðlast valdaljómann.
En engin heldur stöðu og stétt
með stjórnarhausinn tómann.